Geremet Zaman

           Karya : H. S. Permana

Dina zaman nu geus robah

Kuring budak…

Ukur bisa godeg ninggali

Robahna zaman kutingkah polah jalma

Pikasebelen, pikaijideun

Jeung pikaambekeun

Dina zaman nu geus robah

Kuring budak

Ngan bati ngahuleng ngaragameneng

Dina mangsa ningali

Kajadian-kajadian jeung tingkah jalma

Nu sarakah harak, ngaruksak, jeung ngagalaksak

Dina zaman nu geus robah

Kiwari, kuring budak

Ngan ukur bisa cicing ngahening ningali

Nyaksi jeung nyungsi

Robahna zaman jeung prilaku jalma

“Tina gumuruh hate ngageber rasa”

Kalapanunggal, Rebo 17 Februari 2010